Заменик министерот за образование и наука Спиро Ристовски во читалната „1000 книги“ во Градскиот трговски центар во Скопје, промовираше нови десет наслови од проектот за „Превод на стручни, научни книги и учебници од кои се учи на врвните, најдобрите и најреномираните универзитети во САД и Англија, а од областа на правото во Франција и Германија“, со што број на преведени и отпечатени дела достигна 977.
Ристовски истакна дека квалитетните учебници покрај тоа што сега се достапни на мајчин јазик, истите се селектирани по консултациите со академската заедница.
„Секоја книга која ја промовираме во рамки на овој проект е внимателно избрана и препорачана од врвните професори и со тоа оваа литература е директно применлива за студентите и истражувачите бидејќи е направена врз основа на селекција со универзитетите. Меѓу имињата на авторите се еминентни професори од водечките универзитети во светот кои имаат добиено високи призанија за нивните исклучителни придонеси во науката и образованието“, изјави заменик министерот.
Инаку проектот е надоплнет со уште двесте книги, а насловите што денес беа промовирани се од областите: економија, земјоделство, медицина, машинство, електротехника, информатика, архитектура и градежништво.