На иницијатива и во организација на Јапонска агенција за меѓународна соработка (JICA), оваа година Република Македонија заедно со Србија, Црна Гора, Босна и Херцеговина и Албанија во Токио, имаа туристичко промовирање на Балканот, со цел поттикнување поголем интерес меѓу јапонските тур-оператори и следствено зголемување на бројот на јапонски туристи во регионот.
Македонска делегација предводена од Алекандар Донев, директор на Агенцијата за промоција и поддршка на туризмот (АППТ), учествуваше на саемот за туризам “JATA Expo 2017” во Токио, Јапонија во период од 21-ри до 24-ти септември 2017 година, на заеднички штанд со земјите од балканскиот регион. Целта е промовирање на Балканот како привлечна туристичка дестинација на јапонскиот пазар и подигнување на визибилноста на регионот како цалина.
На 21-ви септември, во рамки на Tourism Expo Japan 2017, директорот Донев присуствуваше на Глобалниот форум за туризам и Министерска тркалезна маса на тема: “Одржлив туризам за развој”, што е на линија на резолуцијата на Обединетите нации усвоена 4-ти декември 2016 година за прогласување на 2017-та година за Меѓународна година на одржлив туризам за развој. На гореспоменатите настани учествуваа министри за туризам од различни земји во светот, а видео обраќање имаше и генералниот секретар на UNWTO-Светска туристичка организација, Талеб Рифаи.
На 22-ри септември, на заедничкиот штанд беше организиран прием, на кој присуствуваа голем број туристички агенции од Јапонија и истакнати медиумски групации, кои имаа можност да се информираат за потенцијалот на Македонија и другите балкански земји во областа на туризмот. Во рамките на приемот, Донев оствари средба со генералниот директор на Одделот за индустриски развој и јавна политика при JICA, Тошојуки Накамура и менаџерот на Одделот за односи со јавност при JATA, Јасуко Инаба. На приемот промовирана беше македонска храна и вино.
На 23-ти септември, Марика Ишикава, локално ангажирано лице во амбасадата, одржа презентација на јапонски јазик за Република Македонија пред бројна публика, информирајќи за туристичките потенцијали за земјава и можностите за субвенционирање кои ги нуди АППТ. Обраќање имаше директорот Донев, кој ја претстави Македонија како привлечна дестинација за туризам, повикувајќи ги присутните да ја посетат земјава.
“Трендот на туристичкиот пазар од Далечниот исток цели кон вмрежување на земјите од Балканот и нивно заедничко претставување на трети пазари. Ова е одлична можност за Македонија, зошто само за неколку дена остваривме повеќе состаноци со јапонски тур оператори кои несомнено го изразија својот интерес за Македонија и Балканот како целина. Ја искажавме и нашата подготвеност за поддршка на јапонскиот туристички сектор, преку организирање на B2B состаноци со македонските туристички работници. Тур операторите, Tobu top tours, Nippon travel agency, Yomiuri travel service, World air-sea service, H.I.S се веќе подготвени за отпочнување на соработка со Македонија, а дел од нив имаат организирано кружни тури низ Балканскиот регион”-изјави Александар Донев, директор на АППТ.
АППТ упатува голема благодарност до Македонската амбасада во Токио, до амбасадор Андријана Цветковиќ и Ана Деребан Блажеска, аташе и вршител на работа во амбасадата за поддршката во промотивните настапи пред јапонскиот туристички пазар и залагањето за подигнување на визибилитетот и атрактивноста на Македонија како туристичка дестинација.
Претставувањето на Македонија на “Tourism JATA Expo 2017” е од големо значење за туристичката промоција на земјава, земајќи предвид дека станува збор за е најголемиот туристички саем во Јпонија и еден од најпосетените во Азија. Оваа година се претставија изложувачи од околу 130 земји од светот, 47 региони од Јапонија, 1.310 туроператори и истиот беше посетен од 190.000 посетители.