Tag: цвеќа

Со започнување на месец декември „Паркови и зеленило“ започнаа со засадување на цветниот саден материјал кој ќе ги разубавува парковите во Охрид во зимскиот период. Планирано е од цветната реколта која е од сопствено производство да се засадат 50.000 садници од видот  viola (очиња), како и 10.000 садници од видовите  dianthus (каранфилчиња) и belis (белис).  Со разубавување ќе бидат опфатени: Градскиот парк, Плоштадот, кружните сообраќајници, парковската површина од зградата на Локалната самоуправа, „Булевар Туристичка“ и други зелени површини во градот.

Најпрометната улица во Охрид -„Булевар Туристичка“ ќе ја красат нови леи со ружи, растение кое со право го носи приматот кралица на цветовите. Од денеска се започна со засадување на потегот од спортската сала до сообраќајницата кај гимназијата. На овој потег се засадуваат 150 садници ружи од различен вид и различни нијанси од бои. Со оваа активност ќе се продолжи по целата должина на „Булевар Туристичка“, а предвидено е  леи со ружи да ги красат и другите фреквентни сообраќајници.

Деновиве екипите на „Паркови и зеленило“ ги разубавуваат канделабрите во центарот на градот поставувајќи сто нови саксии со украсно цвеќе од видот сурфинија. Со ова цветно уредување се опфатени локациите кај градскиот плоштад околу споменикот Св. Климент Охридски, градскиот кеј на потегот од градското пристаниште до х.Палас и градската чаршија на потегот од плоштадот до трговскиот центар АМАМ. Овие висечки цветни декорации се вистински украс, го разубавуваат центарот на градот и даваат убава слика за граѓаните и многубројните туристи.