Здружението на рекреативни риболовци „Свети Апостол Петар“ од Охрид за да ја збогати програмата на Денот на масовно капење на рибарите (Ден на рибарите) на 20-ти јануари ќе додели плакета за животно дело – ТРАЈНО УНИШТУВАЊЕ НА РИБЕН ФОНД ОД ОХРИДСКО ЕЗЕРО- сите заинтересирани заслужни и докажани граѓани, институции, правни лица и Здруженија на граѓани своите кандидатури можат да ги достават по пошта на следнава адреса ЗРРСК „Свети Апостол Петар“ ул. Димитар Влахов бб, или на е-маил srdsvapostolpetar@yahoo.com. Најдоцна до 18- ти јануари. Може да се конкурира за дела направени од 1991 до сега. Конкурсот опфаќа повеќе области како: уништување на флората и фауната на Охридско Езеро и неговиот слив, уништување на канал Студенчишта (зимовалиште на риба старо со милиони години), зимовалишта во селата Пештани, Радожда, Трпеица, Градско пристаниште, уништување на Студенчишко блато, како и други области од рибарство , екологија и за идни проекти кои ќе допринесат за доуништување на флората и фауната. На избраните кандидати од Комисијата освен Плакета ќе им додели и уметничка слика од охридска пастрмка.
На 12-ти јули ЗРРСК „Св.Апостол Петар“ од Охрид на Денот на рибарите (Свети апостол Петар и Павле – Петровден) ќе додели плакета за животна дело -УНИШТУВАЊЕ НА ФЛОРАТА И ФАУНАТА ВО РЕПУБЛИКА МАКЕДОНИЈА- на Државно ниво. За овој конкурс може да конкурираат сите докажани граѓани, институции, министерства, градоначалници, и домашни и странски бизнисмени. Конкурсот е меѓународен, а ќе се земат сите дела направени од 1991 година до сега како и дела за предвидени проекти за доуништување на флората и фауната во Македонија.
За детални информации заинтересираните кандидати може да се обратат во просториите на Здружението, на е-маил адреса srdsvapostolpetar@yahoo.com или на телефон од здружението 075/807 809.
