Концертот на хорот „Света Злата Мегленска“ кој се одржа синоќа во црквата „Света Софија“ под диригентство на Летка Димовска- Полизова имаа можност да го проследат во живо и сите љубители на музичката уметност преку веб-страната на „Охридско лето“, кои не беа во можност да присуствуваат во акустичната црква.
Овој реномиран хор и понуди на публиката уште една прекрасна фестивалска вечер. Женскиот хор „Св.Злата Мегленска“ исполни повеќе композиции од македонски и странски автори. Овој хорски ансамбл, кој постои 19 години, има повеќе од 670 настапи низ светот, а многу од овие патувања се овенчани со врвни признанија – доказ за посветеноста и ентузијазмот на неговите членови.
Хорот досега има освоено вкупно 27 награди во повеќе категории, и тоа: четири гран-при, единаесет злата, осум сребра, три бронзи, како и голем број признанија. Со синоќешниот настап продолжува фестивалската традиција, секоја година на програмата да има барем еден хорски концерт.