Пратеничката група на СДСМ и опозицијата поднесе до Собранието измени на закон со коишто власта ќе се задолжи да дава отчет за што и како ги троши народните пари, рече на денешната прес-конференција пратеникот Марјанчо Николов.
„Станува збор за измени и дополнување на Законот за буџетите. Комисијата за финасирање и буџет за ова отвора јавна расправа на 17 септември, на којашто покануваме да учествуваат сите заинтересирани граѓански организации.
Милиони евра пари на граѓаните изминативе 9 години се потрошени во нетранспарентни постапки. Тоа овозможува злоупотреби, корупција и криминал со парите на граѓаните.
Колку е сериозна ситуацијата во Македонија говорат податоците од последното истражување на меѓнародната организација Интернешнл Баџет Партнершип.
Македонија е во групата земји како Зимбабве, кои обезбедуваат многу малку податоци за Буџетот. Потранспарентни се дури властите на Авганистан, Руанда, Конго. Поотчетни од власта на Груевски се властите на сите земји од регионот.“– исткана Николов.
Николов рече дека со измените на законот бараат Министерството за финансии на својата Веб страница да објавува месечни извештаи за трошењата во сите министерства, агенции и фондови. Граѓаните месечно да бидат информирани колку нивни пари тие искористиле и за што, колку доспеани, а неисплатени обврски имаат институциите.
„Бараме Министерството за финансии на својата Веб страница месечно да објавува и список на сите физички и правни лица по министерствата, фондовите, агенциите, на кои им биле извршени исплати од Буџетот, со податоци за датумот, износот и основот.
Ова не се однесува на лицата кои редовно добиваат буџетски пари, како пензионерите и корисниците на постојана социјална помош.
Но се однесува на лицата кои примаат плата преку Буџетот. Граѓаните мора да знаат колку лица се вработени во државната администрација и колку од нив добиваат плата од нивните пари, а не доаѓаат на работа.
Предлагаме вакви извештаи и списоци да доставуваат и сите јавни претпријатија и трговски друштва во државна или доминантно државна сопственост.
Бараме Владата до Собранието да доставува квартални извештаи за извршувањето на Буџетот од тековната година. Сега нема никакви извештаи. Министерството за финансии доставува до Владата полугодишни извештаи, што не се доставуваат до Собранието.“- рече Николов.
Најави дека Комисијата за финансирање и буџет е отворена за сите заинтересирани здруженија на граѓани, кои преку стручната служба можат да го најават своето присуство и активно да учествуваат во креирањето на законските решенија.
„Повикуваме мнозинството да се одважи и да го поддржи предлогот за отчетност во трошењето народни пари.“- додаде Николов.