Претседателот на СДСМ, Зоран Заев денес во изјава за медиумите истакна:
„Почитувани граѓани,
Македонијо,
Подршката на платформата за демократска Македонија расте.
Расте досега од политичките партии, пристигнуваат позитивни информации од граѓанските организации, од многу интелектуалци и ќе расте во периодот како што надоаѓа. Посебно мотивирана од сите овие глупости коишто се случуваат во државата, за жал и од човек којшто ја извршува функцијата Претседател на државата.
Мене ми е драго што се приклучуваат партии со коишто во минатото не сме имале некои директни соработки, освен принципиелни, во функција на интересите на државата.
Еве денеска со Алијансата за позитивна Македонија, со луѓе коишто ги познаваме, наши пријатели, со коишто истовремено застануваме заедно, сплотени рамо до рамо, без било какви предрасуди, заради единствената исконска цел, нашата Македонија и граѓаните на нашата Македонија.
Сакам да испратам порака да продолжи подршката на оваа Платформа којашто е заедничка, којашто е граѓанска.
Целта на платформата, да повториме уште еднаш е регуларни фер и демократски избори, владеење на правото, слободни медиуми, враќање на правната држава, департизација и деполитизција на институциите, зацврстување на начелата на еднаквост и рамноправност во нашето општество и враќање на власта во рацете на граѓаните на Република Македонија.
За овие вредности вреди секој граѓанин да се бори. Верувам дека сите заедно ќе застанеме во конечната борба за враќање на Македонија повторно да биде нормална земја, стабилна земја, да чекори исправено кон евроатланските интеграции.“– рече Заев.